A Bawinu A Ruak An Suannak Biakinn In A Hngah Peng

Italy ram biakinn pakhat ah nifatin te uico te pakhat cu thlacam caan poah ah a rak chuak lengmang ve. Hi uico te hi German Shepherd phun ui ngan ngai a si caah thlacam mi pawl nihcun an ttih i kan thlacam a kan buai ter lai tiah an thin a phang tawn. Asinain, cucu a rak si ziar lo. Uico te cu biakinn chung ah hnachet lo tein le dai tein thlacam cu a ngaih ve ziar tawn. Cuka biakinn thlacam a kal mi hna nih an ruah mi cu “Zeiruang ahdah hi uico te hi ni chiar te thlacam ah a rat peng ve hnga?” ti hi a si. A konglam an hun theih hnu ahcun an zapi a thli tein an mitthli a tla cio i cuticun thlacam nak khan chung cun cu uico te cu an tthawl ngam ti lo. Cuka khua ummi chim ningah hi uico te hi min a ngei tiah an chim. A min ah Tommy a si i nifatin biakinn a kalnak sullam cu a thi ciami a ngeitu nu Maria Margherita Lochi a zuun a ngaih tuk ruangah a si tiah cuka khua mi nihcun an chim.

Cu Biakinn cu a ngeitu nu a thih lio i a ruak an rak suan nak hmun pakhat zong a si tiah an chim. Tommy (kum 7) uico te hi a ngeitu nu a thih thlahnih a luan hnuah biakinn a rak panh lengmang hi a si. Thlacam ahcun nichiar te a va kal peng ve i a ngeitu nu a dam tthan lai le a rak chuak tthan lai ti kha aa ruahchan peng ti a si. Tommy hi Maria nih a rak hmuh ka te ahhin lamcung i aa chawkvak sawhsawh mi uico a rak si. Maria nih a rak i cawm hnuah a chungkhar bantuk in a zohkhenh i a dawt. Maria hi mitha tuk a si pinah uico a daw ngai mi a si. Uico tlaumi tampi aa cawm hna i umnak ttha tein a tuah piak dih hna. Cu lakah Tommy hi a dawt bik mi a si. Tommy hi a kalnak hmun poah ah aa kal pi tawn i, Biakinn a kal zong ahhin aa zulh ter lengmang mi a si.

Tommy zong hi uico fim ngai te a si. A ngeitu nu nih a herh mi a tuah chung poah kha dai tein a hngah tawn i cuticun nuam tein inn an ttin tti tawn. Vanchiat nak cu thlauh khawh le dir ter khawh a si lo bang an i lomh nak ni le caan cu dongh caan a hung phan. Kum 57 Maria cu ruah lo piin a thi i thlacam a kal tawn nak biakinn ahcun a ruakvui nak an tuah piak. Thla 2 a rauh hnuah Tommy cu nifatin te cuka Biakinn ahcun ka bawinu a um hnga maw tiah a va kal lengmang. Maria cu a nung rih mi bantukin a ruah i dai tein biakinn chung cun a hngah tawn. Thlacam mi hna hi ngaihchia lileng in a zoh tawn hna i a lungthin ah ngaichiat lilen nak in a khat mi a lo peng tiah cuka biakinn thla a cam tawn mi pakhat nih a chim.

Tlangbawi pakhat nih a chimmi cu “Tommy hi caan hman tein a ttha mi a si. Ahohmanh harnak a pe bal hna lo. Khrihfabu nih tipil pek nak le ruak thlah nak kan tuah caan zong ah a dihdongh tiang dai teiin a um peng ve. Tommy a biakinn rat a hnut deuh sual hmanhah tlangbawi pa nihhin a rat hlan lo te a hngah peng tawn” tiah a chim. Thlacam nak a dih fatin hi uico te hi a mithmai ah ngaihchiat lilen nak a cuang peng i thlacam i a kal tawn mi mipi nih an zoh ah an lung a ttha hrim tawn lo. Aa pum mi hna nih biakinn a phan peng mi minung pakhat nih Tommy hi hei cawm seh law tihi saduh an thah piak cio mi a si. Tommy hi cuka biakinn a phan mi poah nih an komh, an dawt i lente hna an celh pi tawn. Tommy nih a tuahtawn ning tein a tuah peng ko ahcun cawmtu ttha te aa hmuh tthan te lai tiah ti hi an zumh cio. Cawmtu ttha te a hmuh tthan khawh nak hnga ca zongah lungtak in thlaza an cam piak hna.

|GT

Leave a Reply

Your email address will not be published. Required fields are marked *