A Fapa Puak Pahin Tungbingka(Tricycle) A Mawng Mi Pa Bawmhnak A Hmu

Tungbingka (Tricycle) mawngh pahin a fapa kum 2 aa puak pah tawn mi Philipine rammi pa cu social media thawng in a tu cu bawmhnak a hmu cang. Hi hna pafa kong hi internet hmangtu Jane Eguillos timi pa nih a rak post hmasa i cuti a post mi ruangah bawmchantu an hun chuahnak chan hi a si. Jane Eguillos nihhin a fapa kum 2 puak pahin tungbingka(tricycle) a mawngtu pa cu a hmuh tikah a zaangfak tuk i a min le a konglam a va hal i thil sining cu social media ah a rak thlah. Hi pa hi a min ah Rodolfo Rudy Pastrana ti a si. Rudy an nu hi facebook chungin an i duhdawt chommi a tlangval he an zam i cuticun a fapa le a vapa cu a kal tak hna.

Rudy a nu hi a nung rih nain thil suk nak hmun i rian a ttuan ve caah a tupa te cu zohkhenhtu a ngeihlo nak hi a si. Cu ruangah a pa nihhin a rianttuannak tungbingka a mawnghnak hmun poah ahcun a fapa te cu aa kal pi tawn. Hi tungbingka hi amah ngeih mi siloin mi sinah ah nikhat Philipine tangka Php150($3) in a hlan mi asi caah a miak le a zin a hmuh hlanlo te tiang kha an pafa tein khua chung ahcun tungbingka cu an mawng tawn. Zaanlei sang deuh ahcun a fapa te hi a paw a ttam, hna a hnawk asinain a miak an hmuh hlan lo cu a pa cu a rian a ngol awk kha a ttha lo. Hi ruangah ngakchia pa nunnak caah thinphang a si tiin mi tampi cu an lung a ttha cio lo.

An konglam cu Philipines ram Kapuso Mo timi TV show pakhat ngeitu Jessica Soho(KMJS) nih a hmuh ve i a thinlung a rak laak tuk. Cu ruangah hi hna pafa kong cu TV series bantuk in an tuah i an channel ah an thlah. Cu hnuah ah KMJS nihcun bawmhnak an pek hna i Rudy cu tungbingka(tricycle) an cawk piak pinah ngakchia pa ca caw hnuk, thil puan le a dang herhhai tete zong kha an bawmh chih hna . Rudy a nu zong hi a tupa te zohkhenhtu ding ah tiah a rian zong aa din ve cang i cuticun a tupa te cu amah nih a zohkhenh.

Ref: Rachfeed

Leave a Reply

Your email address will not be published. Required fields are marked *