Ti Fenh Mi Minung Pa 7 Lakah Minung 5 Lawng An Hmuh Rih Hna

Red Cross phu lei in U Hung Kuai nih “June 9 zinglei ahkhan a dongtu hna nu ruak cu Yenan Chaung ah kan hmuh an ti. Ngakchia minung 2 ruak tu kan hmu rihlo” tiah a chim. Chin ram Kanpalet peng Nga Kye khuate in Sagaing ramtthen Saw peng Thigong khuate lei ah sianginn kai mi Chin siangngakchia hi minung 11 an si hna.

June 7 zaanlei sang Thi Gong Khuate in Nga Kye khuate lei an ttin lei ah ruahpi a fak ngai i ti a lian. Cuti ti a lianh ruangah siangngakchia don ah a kalmi nu telh in an zapi minung pa 7 ti nih a fenh hna hi a si. Ti nih a fenh mi siangngakchia hna lakah U Mana Hung le Daw Hlu Thang hna i an fanu Ma Pan Mana kum 10 (taang li), U Hung Thang le Daw Nay Soe hna i an fapa le pahnih Mg Paing Hung kum 9 (taang thum) le Mg Thang Hung kum 8 (taang khat) hna pathum belte hi nungdam in an hmuh hna.

A tang mi minung pa 3 hna hi U Ling Thung le Daw Lai Thang hna i an fale minung pathum Mg Naing Ling kum 9 (taang thum), Mg Thung Ling kum 8 (taang hnih) le Ma Hlu Ling kum 5 (kg siangngakchia) hna le anmah don ah a va kal mi Daw Li Thung (kum 50) hna cu ttuanvo ngeitu cozah lei, khua mi hna le chiattthat zohkhenhnak phu hna nih tiva tlang dawi i an kawl len hna.

Sau nawn an kawl hna hnu June 8 zinglei pa 10 le cheu hrawng ahkhan Saw peng Le Yin khua nitlak lei falong 6 hrawng aa hlatnak tiva tlang ah Mg Naing Ling kum 9 (taang thum) ruak cu an va hmuh. Asinain a taang mi Mg Thung Ling le Ma Hlu Ling tu cu a tu tiang an hmu kho rih hna lo tiah theih a si. Hi siangngakchia hna hi Nga Kye khuate in meng hnih hrawng aa hlatnak Thi Gong khuate ah harsa ngaiin sianginn kai mi an si hna i sianginn an kai tawnnak lampi tiva ah hibantuk vanchiatnak an ton hi a si tiah theih a si.

Credit : MYKS

Leave a Reply

Your email address will not be published. Required fields are marked *