A Farnu A Thih Lai Teah Hnemhnak Bia A Chimtu A Ttapa

Cancer zawtnak ruangah thihnak lampi a phan cang mi ngakchia nute le a ttapa a hmanung bik an biaruahnak cu hringtu a pa nih video a rak thlak hna i social media cung ah a rak thlah. Jackson Sooter kum 6 nih cancer zawtnak a tuarmi a farnu Addy kum 4 te cu a hmanungbik mangttha a cah ta tiah hringtu a pa nih a chim.

Addy hi 2016 in khan cancer zawtnak phun khat nih a tlunh hnawh mi a si. An thlopbul hnuah chikhat te a dam deuh nain ruah lo piin a zual tthan caah nu le pa nih Mexico ram ah an va thlopbul tthan i an thlopbulnak ahhin £150,000 hrawng an dih cang. Asinain an fate cu a zual chin lengmang caah June 3 ahkhan nu le pa le sibawi te nih kut an thlir cang caah a hmanung bik mangttha an cah cio nak hi a si.

Hmanthlak a rak post tu a pa nih facebook ah “Addy cu a luancia ni tlawmpal in khan a zawtnak a zual chin lengmang. Nizaan cu chikhat te a hun i tthang nain aa hngilh colh tthan. A tu cu rawl a ei kho tilo i a dolh kho tilo. Caan tam deuh cu aa hngilh peng caah sizung lawlaw ah kan um pi cang. Caan tampi a ngei tilo” tiah a rak ttial chih.

A pa nih cu ti facebook chung a rak ttial suimilam pakhat a rauh hnu hrawng ah “Addy cu chungkhar hna nih umpi buin a kan liam tak cang. Dai tein a liam i fahnak intuar tuk loin a kan liam tak. Mangttha cah a duh nain a cah manh lo mi hna hawile hna cung zong ah ka lung ttha hin lo. Kan i ruahmi nak leng in tawi deuh a kan nunpi” tiah a ngaihchiatnak kong cu a rak ttial tthan.

Ref: metro

Leave a Reply

Your email address will not be published. Required fields are marked *