A Pa Nih Vat Ter A Duhlo, Kum 50 Hnu An Hun I Ton Tthan Cu

Janice Rude le Prentiss Wilson hi US ram California khua Occidental College ah an rak i tong. Lakphak dawr ah an rak hmuh hmasat hi a si i cuka in cun biatak tein an rak i duh colh. I tthen kho ti baklo in an i duhdawtnak cu a fek chin lengmang. Thla hnih chung sianghleiruun an hun kai hnuah sianghleiruun caantawi khar caan a hun phan. Janice nihcun ni 4 chung a tlangval hmuh lo ding cu a celh baklo. Cu ruangah a hawile sinah Prentiss umnak cu a hal hna i a umnak le Prentiss umnak cu meng 150 aa hlatnak kong kha a hawile nihcun an chimh. Janice cu a thil aa tim i cuticun Prentiss umnak hmun ahcun a va kal. Prentiss te inn hmai a hun phak cu Prentiss chungkhar te zong khuaruahhar khin a chiah hna.

Cu lio kongkau ah Janice nih “ka ral a rak ttha tuk laklawh” tiah a chim. Cuticun Janice le Prentiss cu an i tthen kho chinchin tilo. Cu lio an konglam cu Prentiss nih “kan i ton caan ah ka kut kan i tlai i kan i hnam tawn” tiah a chim ve. Janice nih “cuti kan i tthen khawh tilo hnuah cun i tthitumh ding kan si tiin kan lung ah a um veve cang” tiah a chim. I hamnak an tuah hnuah ah an i hamnak zong cu thawngzamhnak zong ah an rak ttial ter hna. Asinain Janice a pa nih “hitihin a si awk a si lo” tiah a hun ti hna hnuah an i pehtlaihnak cu rawh hram a hun i thawk. Janice a pa nih “Prentiss he nan i tthen lo ahcun na tuition man kan pek piak ti lai lo” tiin thim ding a hun pek. Ngaihchia mitthli tla in le i tthen sianglo cukmak in Janice le Prentiss cu an hun i tthen. Cuticun nun caan dang veve an hun hman hnuah kum caan saupi ton loin an um veve.

Cucu an tuanbia a donghnak a rak si lo i a hmasabik an dubdawt mi minung cu an philh kho veve hin lo. Janice le Prentiss cu cungzingnu nih tonternak caan ttha a hun pek tthan hna. Kum sau nawn a rauh hnuah Janice a nu le Prentiss a nu hi thla khat hrawng hlat in a nunnak a liam veve. Cu ti an nu le an nun a liam hnu ahhin an nu le ngeih mi thil fim mi chungah an min aa tel mi thil biapi pakhat cu an rak hmuh veve tthan. An nu le nihhin Janice le Prentiss an rak i hmannak thawngzamhnak i an rak ttial ter mi hna catlap te cu an rak i fim veve hi a si. An nu le nihcun nuam tein rak i ngei hna seh ti hi saduh an rak thah piak mi hna an rak si ko. Cu caan vialte chung zong ah pakhat le pakhat cungah an lung a dong bal veve lo a ruang cu an rak i duhdawt nak cu an sunlawih tuk caah a rak si.

An nu le an liam hnu kum 10 hrawng a hun rauh hnu ah Janice nih Prentiss cu a hun hmuh tthan. An lung sia an i herh peng ve ve ruangah cuticun pehtlaihnak a thar in an hun ngei tthan. An pahnih in nupi tthi va ngeilo veve an si ruangah khati an i ton tthannak ah donkhaantu thil a um tilo pinah nu le pa thladem tang ah aa dor mi minung an si veve ti lo. 2010 ahkhan an hun i ton tthan hi a si i an i duhdawtnak tucu a zor kho bak ve lo. Cu ruangah kum 50 chung an i tthen hnuah an rak i hmuh hmasatnak bik college ah tthitumhnak an tuah colh. Kum 71 Janice Rude cu a duhdawt tuk mi Prentiss Wilson he tthitumhnak an tuah kho taktak ko cang. An pahnih in “Kan i tthitumhnak a tlamtlin caah kan i lawm tuk veve. Hi vawlei ah caan tam kan ngeih tilo zong kan i theih ca ahhin kan caan a taang mi cu nuam tein caan kan hman lai” tiah an chim. Duhdawtnak taktak an langhter.

Ref:NTD

Leave a Reply

Your email address will not be published. Required fields are marked *