Tthitumhnak Puai I A Kal Mi Ngakchia Kum 6 Nute Cu Lam Mui Lak A Kalpi Hnuah Hitihin A Tuah

Pa pakhat nih tthitumhnak puai i a kal vemi ngakchia kum 6 nute cu lam muihnak lei a kal pi hnuah a tlaihhrem i a thah beh. India ram Gwalior khua tthitumhnak puai i a kal ve mi ngakchia nute pakhat cu ruah lo piin a tlau. An kawl len tlawmpal ahkhin ram lakah ah a ruak in an va hmuh i a mithmai cu tukdennak hliamhma in a khat dih.

Ngakchia nu a tlaunak pawng CCTV an chek tikah kan hnulei ni 4 ni zaan 11:30Pm hrawng ahkhan ngakchia nu cu pa pakhat nih mi um tuk lemlo nak lam lei ah a kal pi lio kha a rak lang. Mipa pawng a kalmi ngakchia nute nih mipa cu ttha tein a zulh nain chikhat te cu a hun zam manh i a luat ko. Asinain mipa nih cun dir dingin a hun au hnawh caah a dir tthan i cupa cu a hnu in a hun zulh tthan. Hi pa hi deilei 2:30am hrawngah amah lawng a rak kir tthan kha CCTV ahcun ttha tein a lang nain a muihmai belte a fianglo.

Ngakchia nute a tlau le cangka hringtu a nu le a pa nihhin tthitumhnak puai ahcun mipi theih in an kawl len pinah thawng zong an thanh colh ko. Palik sin report an tuah hnuah palik nih an hun kawl i tthitumhnak puai in meters 500 hrawng aa hlatnak hmun ram lakah ngakchia nu cu a ruak in an va hmuh hi a si. CCTV chung zohin cuka puai ca rawl pek le herhhai fial dingin an hlan mi minung pawl cu palik nih an tlaih hna. Dothlatnak zong an peh cuahmah i an tlaih mi hna zong cu biahalnak an ngeih cuahmah hna. Ngakchia nu a ruak chektu hna nihcun ngakchia nu a hmai hi lungtum in den a tong lai tiah an chim.

Gwalior khua palik bawi Dharmraj Meena (the Senior Superintendent of Police of Gwalior) nih “kan mi pawl le biachim thiam mi cheukhat cu hi thil a cannak hmun ah an va kal colh. A thihnak hmunhma le a thih ning zoh tikah ngakchia nute hi an tlaihhrem hnuah fak ngaiin an thah timi a lang. Mi tlaihhremtu nihhin lungtum in ngakchia nute a hmai cu a den. Dothlatnak kan peh cuahmah i caan rau lo teah hi thil sual a tuahtu cu kan tlaih colh ko lai tiah kan zumh. Tthitumhnak puai ca rawl pek le herhhai fial dingin an hlan mi minung chungin pakhat kan lunghrinh pah mi a um. Biafiang theih khawhnak dingah biahalnak zong kan peh cuahmah” tiah a chim.

|Metro

Leave a Reply

Your email address will not be published. Required fields are marked *