Falam Peng Valung Khua Ah Thluak Tlamtlinglo Minu Thlam Chungah A Tlaihhremtu Motor Mawng Pa Mandalay Ah A Zam

Falam peng Valung khua i ummi thluak tlamgtlinglo mi kum 32 nu pakhat cu Kalay Myo ummi motor mawng pa pakhat nih thlam pakhat chung ah a tlaihhrem i amah cu Mandalay khua lei ah a zaam tak tiah Zalen thawngzamhnak nih an rak ttial. Thil sining ah kan hnulei June 18 ahkhan hi thluak lei tlamtlinglo deuh minu le a nu hi an alu va hlai dingin an lo ah an kal i cuticun an hlai cia mi alu pawl cu a fanu nih thlam chung ah a va ngalh tawn hna. An alu lo hi Falam-Kalay lampi kam ah a ummi a si i alu ngalh ruah i thlam lei ah a kalmi a fanu a kir tilo caah a nu nihcun an thlam lei cu a hei cuanh.

Cu vial ahcun an thlam kam te ah motor pakhat a dir ko kha a nu nihcun a hei hmuh caah thlam lei ahcun a va kal ve. Thlam chungah a fanu pa pakhat nih a rak tlaihhrem len ko lio cu a hmuh tikah a lau tuk i cuticun tlaihkhih dingin a hei naih nain cu pa cu a zaam colh ve. Hiti mi a tlaihhremtu pa motor hi ruahkhamnak vandum rong aa khuh mi a si i a nu nihcun Falam palik zung ah report nak a tuah colh tiah theih a si.

Valung khuabawi Pu Zam Pian nih “nu hi bia a chim ah a piangpai lo. A hna zong a ttha tuklo i a chimmi bia pawl zong hi a nu lawng nih a theih piak. Hiti tlaihhrem a ton lio ahhin a nu nih hmu hlah sehlaw a thi men ko hnga. A tlaihhremtu pa nih a ka a phih pinah a hngawg zong a dih rih. A tlaihhremtu pa hi kum 40 hrawng minung a si lai. Mi pum ruattha pakhat a si. Kan theih le cangka Taingngen khua palik kan chawnh colh ko hna. Kan hmulo an ti caah meng 9 kaa ummi palik kan hei chawnh tthan hna. Cuka hmun cu zaan pa 9 hrawng ah a va phan. Palik nih an kham hnuah biahalnak zong tlawmpal an tuah ko. Kalaymyo ummi a si cu kan theih tuk. Motor zong hi mi taa a hlan chommi a si fawn” tiah a chim.

Khaikam khua palik bawi pakhat nih “lunghrinh mi mipa nih a sual a phuang duh rihlo. Tette zong pakhat hmanh a umlo caah tlaih khawh a si rihlo. A tu cu Mandalay khua lei ah a kal tiah thawng kan theih. A dang konglam tucu mi tlaihhremtu pa kan thlaih khawh hlan cu kan chim kho rihlo” tiah a chim. Falam peng palik bawi Ngwe Soe zong nih “thil a cannak khua hi kan va kal. Hi thil tthalo a tuahtu zong kan kawl cuahmah” tiah a chim.

Credit to Zalen

Leave a Reply

Your email address will not be published. Required fields are marked *