Hakha Peng, Zokhua phak hlan meng 19 ah thilphur motor aa let, minung pakhat a nunnak a liam

Hakha Peng, Zokhua phak hlan meng 19 ah thil a phur mi motor lian pakhat cu June 28, zaanlei 4:30 hrawng ah lamthlang ah aa let i aho a si hngalh rih lo mi pa pakhat (Kum 20 in 25 kar) a nunnak a liam. Hi motor hi Gangaw lei in Hakha lei a rak kai mi motor a si. Pipe, Miraang vawlei, thir le a dangdang thil a phur mi a si. Minung pathum aa ciit mi an si i a khaaltu a si lai tiah ruah mi pa pakhat a nunnak a liam. A dang minung pahnih cu Hakha Sii-inn ah kalpi an si.

“Motor hi a ke a kuai. Lam riantuan mi a ke a kuai tiah an auhnawh hna, an chimh ko hna. Asinain, an rak lan thluahmah i an thil a rih ca ah a ke khatlei a kuaichap i atu bantuk in lamthlang aa leh hi a si,” tiah Hakha Motor PK pakhat nih The Hakha Post ah a chim. Motor hi lamthlang lei ah a tla i lam in peb150 leng a ril.

Motor a ngeitu, aa hliam mi le a thi mi hi hngalh an si rih lo. “Gangaw asiloah Bago lei motor a si men lai. An mui zoh ah Chinmi an si lai lo aa hliam mi he a thi mi he Kawl miphun an si lai ka zumh,” Motor aa lehnak kiangkap ah a um mi pa upa pakhat nih The Hakha Post ah a chim. A thi mi ruak cu Cung Hu Blood mizaw le mithi phurhnak motor nih Hakha lei ah a phurh tiah Hakha Post nih an rak langhter.

Credit to The Hakha Post

Leave a Reply

Your email address will not be published. Required fields are marked *