Kum 40 Malaysia Pa Nih Kum 11 Nute A Pathumnak Nupi Caah A Tthit

Kum 40 Malaysia rammi pa nih kum 11 nute cu a pathumnak nupi ca dingah a tthit. Cu ruangah Malaysia rammi mi tampi cu an thinhung i mipa thiltuah cu an soisel tuk. Hi thil sining hi Syed Azimi timi nih social media cung a rak thlah hnu lawngah biatak tein mipi nih hun caih a si. A nupi le pahnih hna nih zeitindah kum 11 nute nupi ca tthit ding cu an lungtlin pi hnga tiah a hram thokka ahcun mipi an khuaruahhar.

Thil sining tak ah hi kum 40 pa le kum 11 nute hi tukum 2018 March thla in khan an i duh. Nute hi khoika rammi a si le malaysia rammi a si tak maw timi belte an rak langhter lo. Hi kum 40 pa hi anmah biaknak lei hruaitu pakhat a si pinah mipi nih an upat ngai mi zong a si rih. Kum 40 pa le kum 11 nute a fonhtonh mi hna hi ngakchia nute a nu le a pa an si i an nupa in hi pa sin khairiat lo ah rian a ttuan veve mi an si tiah theih a si. Hmanthlak chung zongah an i tthitumhnak tha a pe ngaimi a nu cu a fanu pawng te a tthut lio cu a rak lang ve. Hi kum 40 pa hi nupi pahnih he khua a sa cang mi a si i a nupi le pahnih theih loin kum 11 nute he cun Thailand ram ah tthitumhnak cu June thla thokka ahkhan an tuah. Nupi le lungtlin hnu lawng ah nupi dang ngeihchap a ngah mi phung aa tlaih mi an si ruangah a nupi le pahnih nihcun cu thawng an theih le cangka bia an chalh colh ve.

Ngakchia tthit cu hruh a si a ti hna nain cu thil cu amah tuahmi te a rak si diam. A nupi pakhatnak hi an i tthitumhnak hmanthlak a kut cung a phanh hi nai te lawng ahkhan a si i cu hnu lawng ahcun thil sining cu a theih chom ve. Kum 40 pa nih ka nupi le pahnih nih an ka theih cang ti thawng a theih le cangkaa in a zaam colh i pehtlaihnak zong tuah khawh a si tilo tiah theih a si. Cu pa a fale zong nih a pa nih a tthit thar mi nute cu anmah hawi lila a si kha an hun theih ve.

Islam biaknak phung umtuning ah pa pakhat cu kum 18 a si hnuah nupi tthit khawh a si i nu pakhat zong hi kum 16 a si hnu lawng ah va ngeih khawh a si ve. Kum 18 le kum 16 tang an si lioah i tthitumh tuah an duh ahcun biacaihzung le nu le pa sinah nawl hal hmasat a si. Hi kum 11 nute konglam ah a nu le a pa nih an lungtlin pi nain biacaihzung nih a theih pi hna lo pinah a nupi dang hna sin zong in lungtlinnak a laak hmasa lo ruangah hi tthitumhnak cu phungning lo a si tiin phungphai a thei mi hna nih an chim. Nihin June 30, 2018 ah thil sining cu JKM Gua Musang ah report a si cang i cu kong hlathlai dingin palik pathum an pok colh ve tiah theih a si.

Ref:Worldofbuzz

Leave a Reply

Your email address will not be published. Required fields are marked *