Voikhat Te Ah Nungak Pathum Aa Chiah Hna, An Poh I An Velh Pinah

Tuluk rammi pa pakhat hmakhat te ah nungak pathum ngeimi pa cu a nungak pawl nih an theih i velh a tong. Nu pathum nihcun an tlangval Mr Fu tiah kawhauh mi nih “kan thinlung le kan tangka a fir” an ti. Hi pa nihhin a nungak pawl cu minung pakhat ah 200,000 yuan (£22,770) cio hrawng zong tangka a hlen rih hna.

Kan hnulei nikhat ni ahkhan a nungak pathum nihcun hmaitonh in bia an chalh hi a si i tuluk ram Nanning khua palik zung ah an report beh tiah an khua thawngzamhnak nih an rak langhter. Hiti nu pawl nih hmai tonh in bia an hal i an velh len ahhin Mr Fu cu lutaw hngal loin zaam khi aa tim len.

Nu pathum nihcun an zapi fonh 600,000 yuan (£68,170) hrawng an kan hlen ti an theih caah palik zung ah anmah nih kalpi an timh. Mr Fu cu a nunnak ruah bak khin zaam aa tim len nain a thinghung ngaimi nu pathum cu a tei kho hna lo. A nungak pakhat Ms Li hi mizer Mr Fu he a rianttuannak ah an rak i tong. Cuticun an rak i duh hnuah Mr Fu nihcun ka nu operation tuahnak ah 220,000 yuan (£22,770) ka herh tiah a rak hal i Ms Li nihcun zei ruat lo bakkhin tangka cu a rak cawih colh.

Ms Li nihcun Mr Fu a cawlcangh nih a zoh lengmang tikah a lunghring. A ruang cu Mr Fu ID a hmuh ballo pinah a umnak inn a chimmi zong kha tu le tu a thlen lengmang. Phone number pakhat ca a kuat lengmang lio a hmuh fawn tikah Ms Li nihcun a thli tein cu number cu aa ttial. Phone ca a kuat mi kong cu Ms Li nih bia a chalh tikah Mr Fu nihcun a thongh i a phone cu ruah lo piin tangah a tla.

Ms Li nih a phone cu rianrang in a laak i cu number cu direct in a chawn colh. An hun tlaih hnuah “a ho na si? Mr Fu he zeitin nan i theih” tiah a hal colh. Khatlei in “a nungak ka si” tiah a rak leh. Ms Li nihcun “keimah zong Mr Fu nungak ka si ve” tiah a hun chimh tthan. A pahnihnak a nungak Ms Wei nih Ms Li he phone kan i chawnh hnu cu ka lung rawk tuk tiah a chim.

Ms Wei nih thawngla hna sinah “kum khat leng kan um tti cang. A ka hlen lai tiah ka ruat baklo. Ka lunghrinh bal ko nain company pahnih ah ka ttuan i ka rian tamtuk a ka ti. Tangka 220,000 yuan (£22,770) hrawng a ka hlen ve” tiah a chim. Ms Wei nihcun a hnuah a hawi ttha Ms Tan zongkha Mr Fu he aa duh vemi an si kha a hun theih chap. Cu hnuah an pathum an i tong hna i an tlangval pa cu hmun khatte ah bia an chalh hi a si. An velh len minutes 20 hnuah palik pawl an rak phan i Mr Fu cu an tlaih tiah theih a si.

Ref:Dailymail

Leave a Reply

Your email address will not be published. Required fields are marked *