Mark Sangpi In Taanghra A Awng Nain Sifah Tuk Ruangah Sianghleirun Pehnak A Ngei Tilo Mi Nute Cu Bawmtu Ttha A Hun Ngei Ve Cang

Magway ramtthen Pwint Phya peng Gong Yong Ah-Hta-Kah sianginn ah taanghra camipuai mark sang ngaiin a awngmi Ma May Thandar Lwin Htun cu sibawi si a duh tuk nain nu le pa harsat tuk ve ruangah a awnnak mark zohin vansang au tuin a ttap. Hi nute hi Magway ramtthen Pwint Phyu peng Wei Dawngh khuate ummi U Myint Htun le Daw Nu Nu Sein fale pathum hna lakah ngakchia bikte a si tiah theih a si.

A pa hi hawidang khuate ummi hna bang caw le lei kuang tibantuk a ngei mi a silo caah a um cop mi rian poah kha a ttuan tawn. A nu hi degree a hmu ve cang mi asinain rian tlaih mi ngaingai ngeih ve loin a um mi poah rian poah kha a ttuan ve ko. Nikhat an ni hlawh kyats 3000 hrawng an hmuh mi te in an fate cu sianginn an chiah ve i taanghra mark sang taktak in a awn piak hna hi a si.

A pa nih kan har tuk Boarder ah na um kho lailo a rak ti lio ahhin an nufa tein an rak ttap. An kut cung tangka umlo nain a nu nih Gong Yawng khua lei ah Boarder chiah dingin suimilam pakhat chung a rak kalpi. Taangkua cu a upa nih a hlawhman tinghnih a cawi piak mi tein a rak um. Kum cheu hnu tangka pek chap ding an ngeih tilo caah fale hna caah fimnak a biapit zia a thei tuk cang mi a nu nihcun an inn cu kawlram tangka ting thum in a pawn tthan. Cu hnuah a fanu cu boarder ah pehtlai tein a um kho tthan.

An khua mei an hmuhnak hi kum 20 leng a lonh cang nain an sifah tuk ruangah an fanu te cu phazawngdan tang ah ca a zoh lio le electric mei a ngeimi hna mi inn kip ah zuamnak taktak he ca a zoh tawnmi a fanu te cu a nu nih mitthli he a thli te khin a zoh tawn. A nu nih “kan konglam chim ahcun a dih ding a si tilo saya pa aw. Tangka cawi laak ding kan va kal tikah a miak fang 4,5 in fang 7 tiang laak ding an kan ti. Ka fanu a duh mi te a kai khawh i a thiam kha ka duh piak bikmi a si. A duhmi lam te ah a kal khawh kha ka duh piak bikmi a si ko” tiah a va lengkai mi hna saya pa pakhat sinah a rak chim.

A konglam a thei mi hna nih bawmhnak an hun hal piak thluahmah i a tu cu TTH group nih si lei sianginn a kai nak caah thlakhat kawlram tangka ting khat in le Teresa Ohn nih thla khat kawlram tangka thong sawmnga bawmh dingin bia an kamh cang tiah theih a si. Ma May Thandar Lwin Htun hi a naitan taanghra camipuai ahkhan D pa 5 a hmuh i a mark a zapi fonh 517 asi tiah theih a si.

Ref: PM

Leave a Reply

Your email address will not be published. Required fields are marked *