A Rianttuannak Boss PaliK Pa Nih A Tlaihhrem Mi Sinum Nu Nih Mitthli He Online In Bawmh A Hal

Palik hi mi bawmchantu le mi tthalo hna kut chung in mi a khamhtu tiin mi zapi nih kan ruah tawn hna. Asinain mi hrawkhrol le mi tthalo palik zong an rak tampi ve. Palik fir le hrawkhrol ko nihhin mi sawhsawh harnak an pek deuh tawn hna i an nawl ngeihnak hmangin bochan awk a ngeilo mi hna kha miaknak le nehsawh thlanglamhnak ah an hman tawn hna.

Philippines ram Koronadal khua in Saudi Arabia ram ah sinum rian a ttuan minu cu a rianttuannak inn ngeitu pa nih a rak tlaihhrem lengmang. Hi inn ngeitu mi tlaihhremtu pa hi palik pakhat a rak si. Hi sinum nu hi pehtlai tein inn ngeitu pa nih a tlaihhrem pinah a velh lengmang ruangah a nunnak ca thinphan in online cungah mi bawmh a rak halnak chan hi a si.

Sinum nu hi palik hna sin rian a ttuannak thla 6 hrawng lawng a si rih. A tlaihhremtu inn ngeitu palik pa hi a min ah Mobark Naser Alshahrni ti a si. Philippines nu cu a min ah Jen ti lawng an rak langh ter i a boss pa nih a tlaihhrem hi anmah lawng an um tti lioah a si tiah theih a si. Amah hi palik a si ve caah sinum nu nihcun cubantuk thil tthalo a tuah lai ti cu a rak ruat lo.

A rak tlaihhrem hi mui kaa hrawng ah a rak si i Jen chim nak ah “suimilam pathum chung bawmchantu ngei loin a ka tlaihhrem” tiah bawmh a halnak video ahcun a rak chim. Jen hi kum 33 minung a si i a pum cu palik pa a tukvelhnak ruangah hliamhma in a khat. Cu lawng hlah palik pa a nau pa zong nihhin Jen cu tlaihhrem a rak timh lengmang ve tiah theih a si. Hi thil hi kan hnulei June 28 ahkhan Jen nih Philippines ram hrambunh Radio station pakhat ah bawmh a hal hna hnu lawngin mipi nih an hun theih cio hi a si.

July ni 5 ahkhan cuka station rianttuan tu hna tawlrel pi nak le bawmhchanhnak thawng in Jen cu Philippines ram ah a kir kho cang. A boss pa zong cu palik sinah report a si cang i an chim ningah hi inn ngeitu pa hi rithaisi a hmang mi zong a si i amah tu cu a zaam colh tiah an chim. An tlaih khawh cang le tlaih khawh canglo bele an rak langhter chih lo.

Ref: BROFW

Leave a Reply

Your email address will not be published. Required fields are marked *