An Tilawng Pah An Ton Ruangah A Nunnak A Liammi Chin Nu Kongkau Ah Palik Nih Zeihmanh Tuah An I Timlo

July 11 nithum ni ahkhan Rakhine ramtthen Myok Oo peng Layngyintaung khua pawng Lay tiva ah tilawng pahnih an i pah. Cuti tilawng pahnak in Paletwa peng Buai Laung khua ummi BCM church Pastor U Mana Thang le Daw Sin Zar hna i an fale minung pa 8 lakah a pathumnak a simi Ma Hmeih Thang kum 22 cu a nunnak a liam.

Thil siningah Ma Hmeih Thang he tilawng aa cit tti mi hna hi minung 7 an si hna. Paletwa khua ah sianginn ca chimh rian sawknak camipuai va phit ding ah tilawng in an kal hna hi a si. Cuti tilawng an i cit ko lio Myok Oo peng Layngyintaung khua pawng an phanh ah an i cit mi tilawng cu a ngan deuhmi tilawng pakhat nih fak ngaiin a rak pah hna. An tilawng aa leh caah aa cit mi minung, an thilri pawl cu ti chungah an tla dih hna.

Cuticun ti an i lio cio hna i tiva kam an hun phan tikah Ma Hmeih Thang cu a rak i tel ti lo. Cuticun Ma Hmeih Thang kawl pah le an thil chuah pah in an i tuai cuahmah ko hna lio ah a pahtu hna tilawng nihcun a zaam tak diam hna. Cu zaan cu Ma Hmeih Thang cu an kawl cio hna pinah Layngyintaung khuami zong nih an kawl bawmh ve hna. Hi lio ah palik cu phone chawnh in thil sining an rak chimh cang hna.

A thaizing cu an kawl tthan i Ma Hmeih Thang cu a orhlei ban kiah bu he a ruak cu an va hmuh. A ruak an hmuh hnuah Ma Hmeih Thang le chungkhar hna nih Myok Oo peng palik sakhan ah va kal in tazacuainak kan tuah ti lailo tiah an chim hnuah a ruak cu khualei ah an kir pi. Hi kongkau ah chungkhar hna nih tazacuainak an tuah ahcun tu le tu Myok Oo peng palik sakhan le biacaih zung ah rat peng ding an si pinah a ruak zong kha khua leiah tuan ah phorh khawh dawh a si lo ruangah tazacuai an i timhlo nak bik a ruang cu a si.

Hi kongkau ah palik nih anmah tein cuti thil sual a tuahtu cu kawl zong cu an i tim baklo i dantat ding zong an i timlo tiah theih a si. Zei ruangah cu kongkau ah dothlatnak le misual cu nan kawl hna lo tiah ke thluan bu le hnangam ngaiin a to mi palik pawl cu an hal hna tikah chungkhar hna nih report an tuah lo caah zeihmanh kan tuah kho lo i dantat khawh zong a silo tiah an rak ti salam hna.

Ngakchiatnak a tongmi chungkhar hna nih tangka dih ding le tu le tu Myok Oo khua rat ding an si caah taza an cuai lonak chan cu a si. Ma Hmeih Thang a ruak an hmuhnak hmun zongah palik pakhat hmanh an de lo tiah cuka hmun a ummi minung pakhat nih a chim. Tu ning cun kawlram cu mi harsa le mi sifak hna nih ngaihchiatnak le harnak ton zongah palik nih zeihmanh tuah piak khawh dawh lo phun in a um. Sifak hna kan caah dinnak a ttan pi lo mi cozah nih mi ngaihchait retheih nak an zual ter chinchin.

Ref: BuHtangpai

Leave a Reply

Your email address will not be published. Required fields are marked *