Puan Zunhnih Man An Leiba Ai Ah An Inn Le An Hmun An Chuh Hna

Bago ramtthen, Tharyarwaddy pengkulh Kyuhpinkoh khua Thay Gong sang ummi amiak in mi tangka a cawih tawn mi hna nih puan zunhnih cu mi dang sinah kawlram tangka 20000 in a ba in an zawrh hna. An leiba ai ahcun an inn le an hmun an chuh hna ruangah Kyuhpinkoh khua eihmuar dohtu phu hna sinah reportnak an tuah ve.

Kyuhpinkoh khua Hluttaw U Aung Ko Min nih “keimah sang thil cang a si. Tangka 20000 an rak cawi hna lio ahhin sachoh zong an rak tuah i sang upa nih a rak telpi hna. Cu hnuah tangka mi a cawih tawn mi hna nihcun sihni a rak i auh i a dang catlap pakhat ah an sin tangka a cawi mi hna cu kutpi an nam ter tthan hna. Cu hnuah taza an i cuai i biacaih zung nih tangka a miak mi cawihtu hna cu a tei in bia an chah piak hna caah an inn in an chuah ter hna hi a si. Asinain hihi thil diklo a si. Hi kong he pehpar in nawl ngeitu hna he i chawnhbiak hnuah kan bawmh tthan hna lai. Biacaihzung ah zeitindah taza an rak cuai hna timi kong theih duhah taza an rak cuainak hna ca zong kan copy cang. A herh ahcun eihmuar a dohtu hna zung tiang tazacuainak kan tuah ve lai. Tangka miak tampi laak in sang chungah mi tangka cawih a hmangmi hna ruangah mipi an harsatnak kong zong hi Hluttaw ah kan caihhmai rih lai” tiah a chim.

Inn le hmun chuh a tongmi Daw A Maa Kyi nih “puan zunhnih ka fanu nih a cawk. Cucu min an ka thut ter. Min thut ka thiam lo ruangah hramhram in ka kutpi neh catlap cungah an ka nam ter. Ka fanu nih tangka kan cawi mi a ning tein a va pek tthan hna nain an rak duh tilo. Biacaih zung i taza an kan cuai ruangah nau a pawi mi ka fanu cu a thi. A fate zong a thi. Cu ahcun biacaih zung ah kan in tei hna caah tiin palik he kan inn in an kan chuahter hoi. Tu thla 23 inn in nan chuah lo ahcun hramhram in palik he kan in chuahter hna lai an kan ti” tiah a chim.

Thay Gong sang upa U Tun Tun nih “Puan zunhnih a ba in an rak cawk mi hna cu a karh lengmang i 500000 tiang a phan. Cucu biacaihzung ah taza an cuai hna. Biacaih zung ttuan mi hna le palik pawl nih Daw A Maa Kyi cu an rat hnawh i inn in an chuah ter hna ruangah tangka a rak cawihtu hna Daw Ei Ei Khine cu kan va chawnhbiak. Sang mi hna he i bawm in 500000 kan in pek lai kan ti i 1000000 lawng in ka duh tiah a kan al. Cu ruangah sang chung chiattthat zohkhenhnak phu hna sinah bawmh kan va hal hna i tangka 1000000 cu i ken in kan va len tthan. Cu zong cu a duhlo i tazacuainak ah teinak ka hmuh caah inn le hmun kaa laak hrimhrim lai a kan ti tthan” tiah a chim.

Biacaihzung ah na sung an ti ruangah inn le lo chuah an fial mi Daw A Maa Kyi hi tazacuai an ton ruangah a fanu nih a thih tak. A tule pa 3 amah i zohkhenh ding cu a caah a harsa ngaingai. Hi bantuk thil cang mi ruangah sang chung um hna nih duhlo nak langhter ding zong timhtuahnak an ngei tiah theih a si.

Ref:Phothutaw, Do not copy.

Leave a Reply

Your email address will not be published. Required fields are marked *