Khin Mar Myint Nih Hrokhrol In Taza A Cuai Ruangah Thong A Tlami Aung Naing Htun A Nu Harsa Ngaiin A Um, Ihzaunak Hmun A Ngei Tilo

Daw San San Win te nufa hi a hlan ahcun mi inn hlan te in khua a sa mi an si ve ko nain a tu cu a fapa lahkhah a ei tilo ruang le thong a tlak ruangah inn man a pe kho tilo i hringtu a nu cu innpa kip sinah a riak tawn tiah theih asi. Mi cheukhat nih biahalnak tuah dingin an va kal hnawh ahhin inn a ngeih tilo caah mi inn a rak riahnak ah bia an va hal. Daw San San Win chim ningah nufa hna hi an pa nih tuan ah a rak liam tak cang hna. A fapa Mg Aung Naing Htun hi nikhat kyats5000 le kyats 6000 hrawng in mirum pakhat sinah kum 14 leng rian a ttuan cang mi asi. A nu hi mi thil suk in pawcawm nak cu a kawl ve tawn caah an nufa in inn pakhat te an rak i hlan i cuticun nuam tein khua an rak sa.

A tu a fapa a um tilo ruang le tangka lut an ngeih tilo ruangah a remnak poah ah riah le vaih in a umnak kong kha Daw San San Win nihcun mitthli he a chim. A fapa Mg Aung Naing Htun cu lemcang Thiha Tin Soe nih a ka tlaihhrem a titu Khin Mar Myint nih tlaihhrem sualpuh in taza a cuai ruangah thong a tla. Hi thil hi zeitin ka tlangtlak lai ti ka thei velo tiah Daw San San Win nihcun a chim. A fapa a boss te zong hnahnawh a pek duh hnalo caah an sin a kallo nak kong zong kha a rak chim chih. Thong chung i a fapa a va ton poah ahhin a fapa nihcun “kanu hi thil hi ka tuah baklo” tiah mitthli he a chimh lengmang nain a nu nihcun lungtthalo le ngaihchiat mitthli tlak dah tilo a tuah piak khawh mi zeihmanh a um lo. Daw San San Win nih bochan ding tiah hi a fapa pakhat te lawng hi a ngeih. Tangka an ngeih lo ruangah a fapa nihcun thong chung ah mikip an rian a ttuan piak tawn hna.

Hi pa hi biacaihzung ah voi 10 lengkai chuahpi asi cang nain cu vialte chungah a rianttuannak mirum pa nihcun a rak telpi bal hna lo. Palik sin Khin Mar Myint nih report a rak tuah hna hlan ahhin a fapa rian a ttuannak a boss pa nih Khin Mar Myint cu kyats 2500000 a rak pek cang. Kyats ting zakhat an hal tthan hna i an pek khawh hnalo ruangah report a rak tuah hna hi a si. A voikhatnak Aung Naing Htun palik zung an chuah pi lio ahhin Khin Mar Myint, puaisa Daw Ngyo, adang pa 1 le nu 3 an zapi minung 6 nih minung pakhat kyats 500000 cio nan kan pek ahcun taza kan cuainak kan dorh deuh lai tiah an rak ti hna nain pek awk an rak ngei ti hna lo. Hi kong hi Aung Naing Htun rian a ttuannak a boss pa zong nih interview pakhat ah a rak chim bal cang.

Biahalnak an tuah lio Aung Naing Htun a nu a rak riahnak inn ngeitu hna zong nih “Tlaihhrem an puh ni CCTV nih a tlaihmi Video cu ttha tein ka zoh ve i tlaihhremnak dawh dang pakhat hmanh ka hmu baklo. Tlangval pa cu kudawng chungah a lut. Tlawmpal ah nih buin an pahnih in an rak chuak tti ko. Cun hi nu a mui kan hmuh bak hin Bago zongah hrawkhrol in hibantuk a rak tuah cang mi kha kan hun theih tthan. Asinain cu kongkau ah tazacuai nak ding ca a bawmtu hna sakhan hmu pa nih zeihmanh ka thei lo a ti i kan khuaruah a har tuk” tiah a chim ve.

Hi thil kongah Pohmah 376 mi tlaihhrem sualpuh nak in tazacuai a tong mi le Bago thong inn i a ummi Aung Naing Htun cu a palhlo nak kong hi mi zapi theih asi cang. Taza a cuai tu le puaisa nu hna zong hibantuk firkhut ruangah tlaih an ton cang cu kawlram mipi theih a si fawn. Asinain sualnak a ngeilo buin thonginn chung ummi Aung Naing Htun bel cu luatnak pek a si lai maw timi theih khawh asi rihlo.

Ref: Bago Online News

Note:Do not copy.

Leave a Reply

Your email address will not be published. Required fields are marked *