Nupi Tthi Tlangval Pa A Ratlo Caah Monu Nih Mitthli He An Puai Rami Mipi A Chawnhbiak Hna

Thailand ram nitlaklei Rajpuri khua tthitumhnak puai pakhat ah nupi tthi tlangval pa cu an puai a ratlo caah monu nih an puai a rak chuak mi mipi pawl cu mitthli he a chawnhbiak hna. Manong tiah kawhauh mi kum 25 hrawng nu pakhat cu a tlangval Naingthin kum 18 he an i duh i tthitumh dingin khua an khang. Kaphnih nulepa an i ton hnu July 21 ahkhan Manong te inn ahcun tthitumhnak puai cu an tuah. Asinain cuti puai an tuah lai zaan july 20 in khan Naingthin cu a tlau. Naingthin lawng tlau loin an chungkhar ning pi hrimhrim in ahohmanh an rak chuaklang ti hna lo.

An puai lai zaan ahcun Naingthin nulepa nih man an hauh mi hna tangka baht 200000 an ngeihlo pinah an fapa hrimhrim a umlo ti kha nu lei chungkhar cu theihternak an tuah hna. Manong te nihcun an puai piat lai an duhlo caah Naingthin he aa lo ngaimi pakhat poah nupi thi tlangval pa airolh dingin khua an khan. Naingthin a pate hi amah Naingthin he an i lawh ngai caah cu pa cu an va fial nain hlan man baht 1000000 a hauh hna caah monu lawng in cun tthitumhnak puai cu an tuah tthan. Tthitumhnak puai ahcun monu nih nu lei cun zeihmanh chanbau lo tein an tuah dihnak kong, pa lei nih man an pek khawh hna lo ruangah an lek taknak hna kong le hi thil kongkau thil sining theih taktak hmasa loin ahohmanh mawhphurh len hna lo dingin nawlnak a tuah.

Thawnglatu hna nih Naingthin cu pehtlaihnak an tuah tikah Manong he a luancia thlahnih hrawng in khan facebook in an i duhnak kong, voikhat hmaitonh in an i tong i cu ahcun nupa sualnak an tuahnak kong le hiti nupa sualnak an tuah lioah khamnak a hman ko nain nau ka pawi tiin nulepa sinah nupi ca dingin hal a fialnak kong pawl kha a rak chim. Naingthin hi amah pumpak hrimhrim nih nupi tthit ding ka za rihlo aa ti ko nain nu lei nulepa hna nih a nu le a pa cu an fanu rak hal dingin pehtlaihnak an tuah hna.

An fanu an va hal hna ahcun nu lei chungkhar nih an fanu man ah baht 200000 le sui an rak hal hna. Tangka an kawl khawh tilo ruang le amah Naingthin hrimhrim hi nungak dang a ngeih ruangah hiti a umnak kong cu thawnglatu pawl nih an rak ttial. Cu ruangah nu lei chungkhar hna nih an puai tuahnak man cu liamh hna dingin pa lei chungkhar cu taza an cuai hna tiah Thailand Tv channel 3 le channel 31 nih an rak langhter.

Ref:DVB

Leave a Reply

Your email address will not be published. Required fields are marked *