Kum 12 Minung A Tliahhremtu Minung 18 Sihni Pawl Nih I Sum Kholo In Tukvelh Dingin An Zuanhnawh Hna

India ram Chennai khua ah kum 12 minung te cu patling 18 bak nih an tlaihhrem. Hiti a tlaihhremtu pawl biacaihzung an chuahpi hna ahhin sihni pawl nih i sum kholo in tukvelh dingin an zuanhnawh hna ruangah palik nih an tthen hna tiah India Times thawngzamhnak nih an rak ttial. Thawngpang an ttial ningah kum 12 nute hi amah a umnak ttaih khan chungah security pawl, cuka inn building services a ttuanmi hna le ti pipe a ser mi hna nih thla 7 chungah tu le tu an rak tlaihhrem lengmang hi asi.

Cu pinah upa na theihter hna ahcun video kan in thlak mi social media ah kan thlah lai tiin le kan in thah lai tiin an tlerhkhawnh rih. Nute nihcun Delhli leiin a rak tlawng mi hna an nute a chimh i cu hnu lawng ah chungkhar hna nihhin an theihchom nak asi i palik sinah report an tuah colh venak hi asi. Cu hnuah thil sual a tuahtu minung 18 cu palik nih an tlaih hna i biacaihzung ah an chuah pi hna.

Biacaihzung an chuah pi hna ahhin sihni cheukhat cu an thin hung tuk i i sum kholo in mi tlaihhremtu cu an zuanhnawh ve hna. Palik pawl nih sau nawn an tthen hna hnuah an lung a dai tthan. India ram ahhin nitin tlaihhremnak case tampi a um ko nain mi tampi cu chim ngam loin dai tein aa in mi an tampi rih tiah thiamsang hna nih an chim. Tukum kum thawk lei ahkhan India cozah nih kum 12 tang tlaihhrem mi hna cu thih dan pek ding tiah phung thar a ser ko nain tlaihhrem sual tuahnak tucu a zor deuh hleilo tiah theih asi.

Ref: Myanmar Note

Leave a Reply

Your email address will not be published. Required fields are marked *