Mawtaw Pah Ruangah A Nu Nauinn A Kuai I Amah Teim Lengah A Rak Chuak, A Min Ah Pathian Nih A Hunphenh Mi Tiah An Sak

Brazil ramah ttihnung tuk mi mawtaw accident a cang i nau a pawi liomi nu pakhat cu a nauinn a kuai i a nauinn cu vanthat ah hramh cungah a va tla. A van a ttha tuk mi cu ngakchia nute kong cu hitihin kan theih khawh tawk a si. A thla a tling dengcang mi nau pawi nu nih truck pakhat cu a rak zulh hna. Lam cung an kal cuahmah lio ah an mawtaw cu break a poh i an i let.

An mawtaw aa leh lio mawtaw aa mer lio ahkhin mah naupawi nu cu aa hlonh i a tla. Cuti a tlak hnu ahcun mawtaw cung in a rak tla mi thingphal nih a paw kha a tlak hnawh i a paw chung i a um a fa te cu a rak chuak. Lung nuam lo ngaimi thil belte cu bawhte i a nu hi cuka hmun ahcun a nunnak a liam colh.

Asinain anu paw chung in a chuak mi a fate tu cu an mawtaw aa leh nak in metre tawmpal aa hlatnak hramh cung ah a ttah bu in mibawm tu hna nih an va hmuh. Mah a fate cu nute a si i a laihri kha aa tan nain khuaruahar ngai asi mi cu aa hriahnak le aa khawndennak zong pakhat te hmanh um loin ngandam tein a um kha an hmuh. Mah ngakchia nu te cu a naihniam bik nak sizungah an kalpi colh.

Mah thil a cannak hi Brazil ram south east Sao Paulo le Curitiba karlak ah a si. ngakchia nute a nu kong cu an hlathlai tikah nau pawi mi a si ti pin cu a dang zeihmanh a konglam an theih khawh mi a um lo. Hi thil a cannak a va kal vemi mi bawmtu pakhat nihcun ” a hmun ka phak ahhin truck mawngtu pa hi hliamhma tlawmpal a rak ing. Ngakchia ttah thawng kan theih hnuah thingphel tangah nu pakhat a thimi kan hmuh, ngakchia te tu cu a nu he aa hlat deuhnak ah kan hmuh i kan hmuh le cangka in sizung mawtaw kan auh colh hna. Ngakchia te hi a nu paw a keh hnu ah a rak chuak mi a si ko, an i leh ning hi a fak tuk caah ngakchia te cu a nu paw a keh nak in a rak chuak hi asi” tiah a chim.

Mah hngakchia nute cu pound 6 le 8 onz a rit i a min ah giovanna (pathian nih a hunphenh mi) tiah an sak. Truck mawngtu pa tu cu sizung ah a kal ko nain thil a can ni ah khan a chuak tthan. Tu ahcun Mawtaw mawngtu pa cu mawtaw mangh lioah mi thih ter case in taza an cuai tiah thawng theih asi. Mah a thimi naupawi nu tu cu palik nih chungkhat a ngaih le ngaih lo an hlat cuahmah lio pi a si i chungkhat hna a ngaih lo ahcun a ruak cu hitihin vui i a fate tu cu ngakttah sianginn ah chiah ding in an timtuah lio a si tiah theih asi.

Ref:Shwemom

Leave a Reply

Your email address will not be published. Required fields are marked *