Kum 11 Ngakchia Nu A Tthi Mi Malaysia Pa Chungkhar Hna Kar Lakah Remlo Nak Meici A Karh Thluahmah Cang

Che Abdul Karim timi Malaysia rammi kum 41 pa nih kum 11 nute cu a pathumnak nupi caah a tthit. Cu ruangah an konglam nih Malaysia ram khuapi a cul. Che Abdul Karim a nupi pahnihnak nih “kan pa nih chungkhar caah zeihmanh bawmhnak a chuah pilo” tiah a chim.

Karim a nupi pahnihnak Siti Noor Azilah nih an pa a khiar tuknak kong le an chungkhar caah zeihmanh bawmhchanhnak a peklonak hna kong cu a rak chimphuan dih. Siti nihhin Karim he fanu fapa 4 an ngeih hna i pakhat hi mi damlo ngai asi. Changreu a zuar mi Siti nih “kan cung ahcun an khiar tuk i tangka ka ngeilo a ti peng. Asinain kum 11 minung Ayu tthitnak le Honey moon chuahpinak ahcun tangka a ngei tuk hoi. Kan pa nih a fale a zohkhenh bal hnalo. Ayu kum 11 a nupi dah tilo cu ngakchia dang hrimhrim a remmi pa asi lo” tiah a chim.

Karim nih nupi pahnih a ngeih hnuin adang pakhat kum 11 minung te cu nupi ca i a tthit chap ruangah a nupi le pahnih thinhung ngai i an umnak hi asi. Siti nih “Amah maw kan mah dah tiah kan thim ter cang. Kan pathum in um tti ding cu a si kho baklo tiah kan ti cang” tiah a chim chap. Karim a fanu kum 14 nute an pa nupi thar Ayu he hawikom ttha asi mi zong nih a pa tuahsernak a thinhunnak kong cu “ka hawi ttha bik minu cu ka nuei asi ve cang. A sullam hrimhrim a umlo” a ti.

Che Abdul Karim tu nihcun kum 11 nute Ayu nupi ca a tthit mi kongah “sifah harsatnak in an chungkhar ka chuah hna caah upat awk tlak thil ka tuah” a ti ve. Karim hi Malaysia ram Kuala Betis Muslim biakinn ah upat ngaimi biaknak lei upa pakhat asi. A rianttuan tti hawi Sayed Noordin zong nih Karim thil tuah a lungtlinpi tuknak kong cu “Abdul Karim cu biakinn thlacam ah nifatin a rami muslim ttha pakhat asi. Islamic phung nih nutling asi dengmi ngakchia cu nulepa nih lung an tlin pi ko poah ahcun nupi tthit va ngeih khawh an si ko tiah phung a onh. Islamic phung umtu ningah nu a lungtlin, nulepa an lungtlin i nute a thi a rat cang poah ahcun tthitumh cu a ngah tuk cang. Karim cu mi ttha tuk asi. Nifatin thalcam ah biakinn ah a ra tawn mi asi. Ttuanvo a la ngam ding minung asi” tiah a chim.

Che Abdul Karim le Ayu hna hi nupa sinak tu cu Ayu kum 16 a tlin hnu lawng ah an tuah kho lai. Che Abdul Karim nih a nupi kum 11 te cu a duh tuk hringhran ko tiah Malay Mail thawngzamhnak nih an rak ttial.

Ref: Malay Mail

Leave a Reply

Your email address will not be published. Required fields are marked *